ຜົນສໍາເລັດການຈັດຝຶກອົບຮົມຫົວຂໍ້ “ການວິເຄາະລາຍງານທາງການເງິນກ່ອນປ່ອຍສິນເຊື່ອ”
ສະຖາບັນການທະນາຄານໄດ້ສໍາເລັດການຈັດຊຸດຝຶກອົບຮົມໄລຍະສັ້ນຫົວຂໍ້: “ການວິເຄາະລາຍງານທາງການເງິນກ່ອນປ່ອຍສິນເຊື່ອ” ໃຫ້ກັບບັນດາທະນາຄານທຸລະກິດລັດ, ເອກະຊົນ, ສະຖາບັນການເງິນ, ຄູອາຈານ ສທຄ ແລະ ບໍລິສັດມະຫາຊົນ, ບັນຍາຍໂດຍ ທ່ານ ປທ. ຄອນສະຫວັນ ສຸດາຣົດ, ທ່ານ ປທ ອານັນທະລາ ນະຄຽງຈັນ ແລະ ທ່ານ ປທ ແກ້ວອຸດອນ ແກ້ວເທພາ ເຊິ່ງເປັນນັກວິທະຍາກອນທີ່ມີປະສົບການຫຼາຍປີ, ມີນັກສໍາມະນາກອນເຂົ້າຮ່ວມທັງໝົດ 37 ທ່ານ, ຍິງ 16 ທ່ານ, ຜ່ານການຝຶກອົບຮົມໄລຍະເວລາ 5 ວັນ. ນັກສໍາມະນາກອນໄດ້ຮຽນທິດສະດີກ່ຽວກັບພາບລວມຂອງເອກະສານລາຍງານທາງດ້ານການເງິນ ແລະ ບົດລາຍງານປະຈໍາປີ, ນອກນັ້ນນັກສໍາມະນາກອນຍັງປະຕິບັດຕົວຈິງກ່ຽວກັບການວິເຄາະເອກະສານທີ່ເປັນອົງປະກອບຫຼັກໆຂອງເອກະສານລາຍງານທາງການເງິນເຊັ່ນ: ຫຼັກການ ແລະ ເຄື່ອງມືວິເຄາະລາຍງານທາງການເງິນ, ວິເຄາະທຸລະກິດເພື່ອການລົງທຶນທີ່ວັດແທກຈາກກະແສເງິນສົດ, ການນໍາໃຊ້ແບບຈໍາລອງເຂົ້າໃນການວິເຄາະທຸລະກິດຂອງລູກຄ້າກ່ອນປ່ອຍສິນເຊື່ອ ແລະ ການນໍາໃຊ້ຫຼັກການວິເຄາະລາຍງານທາງການເງິນເຂົ້າໃນການລົງທຶນໃນຫຸ້ນ. ພາຍຫຼັງສໍາເລັດການຝຶກອົບຮົມຄັ້ງນີ້ຫວັງວ່ານັກສໍາມະນາກອນຈະນໍາເອົາຄວາມຮູ້ທີ່ໄດ້ຮຽນມາໄປໝຸນໃຊ້ເຂົ້າໃນວຽກງານຢູ່ພາຍໃນອົງກອນໃຫ້ມີປະສິດທິພາບຫຼາຍຂື້ນ.
.png)
.jpg)
.png)
