ກອງປະຊຸມສະພາບໍລິຫານ ສທຄ ສະໄໝສາມັນ ຄັ້ງທີ I ປະຈໍາປີ 2017
ໃນຕອນເຊົ້າຂອງວັນທີ 30 ສິງຫາ 2017 ກອງປະຊຸມສະພາບໍລິຫານ ສະຖາບັນການທະນາຄານ ສະໄໝສາມັນ ຄັ້ງທີ I ປະຈໍາປີ 2017 ໄດ້ຈັດຂຶ້ນ ໂດຍພາຍໃຕ້ການເປັນປະທານຂອງທ່ານ ຄໍາວົງ ທິບພະວົງ ຮອງຜູ້ວ່າການທະນາຄານແຫ່ງ ສປປ ລາວ, ປະທານສະພາບໍລິຫານ ສທຄ, ທ່ານ ນ. ດວງດີ ພິມວົງສາ ຫົວໜ້າສະຖາບັນການທະນາຄານ, ຮອງປະທານສະພາບໍລິຫານ, ພ້ອມດ້ວຍສະມາຊິກສະພາບໍລິຫານຈາກບັນດາກົມ ທຫລ ທີ່ກ່ຽວຂ້ອງ, ກົມການສຶກສາຊັ້ນສູງ ແລະກົມອາຊີວະສຶກສາ ກະຊວງສຶກສາທິການ ແລະກິລາ; ນອກຈາກນັ້ນຍັງມີຄະນະ ສທຄ ແລະຫົວໜ້າພະແນກພາຍໃນ ສທຄ ເຂົ້າຮ່ວມ.
ກອງປະຊຸມໄດ້ດໍາເນີນໄປເປັນເວລາເຄິ່ງວັນຕາມວາລະ ໂດຍທ່ານ ນ. ດວງດີ ພິມວົງສາ ຫົວໜ້າສະຖາບັນການທະນາ ຄານ, ຮອງປະທານສະພາບໍລິຫານ ສທຄ ໄດ້ລາຍງານຕໍ່ກອງປະຊຸມຮັບຊາບເຖິງຜົນສໍາເລັດໃນການຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມສະພາບໍລິຫານ ສທຄ ຄັ້ງຜ່ານມາ, ຜ່ານຮ່າງບົດສະຫຼຸບການເຄື່ອນໄຫວວຽກງານ ປະຈໍາ 06 ເດືອນຕົ້ນປີ 2017 ແລະທິດທາງແຜນການ 06 ເດືອນທ້າຍປີ 2017 ພ້ອມທັງປຶກສາຫາລືບາງບັນຫາ, ເຊິ່ງຜູ້ເຂົ້າຮ່ວມແຕ່ລະທ່ານ ໄດ້ເອົາໃຈໃສ່ປະກອບຄຳເຫັນຕໍ່ບັນຫາຕ່າງໆ ຢ່າງກົງໄປກົງມາ ເພື່ອເປັນບ່ອນອີງໃຫ້ ສທຄ ນຳໄປຈັດຕັ້ງປະຕິບັດຢ່າງມີປະສິດທິຜົນໃນຕໍ່ໜ້າ.
